Мэдээллийн технологийн мэргэжилтнүүдийн ур чадварыг дээшлүүлэх олон улсын түвшинд хүргэх зорилгоор Мэдээллийн технологийн үндэсний парк, Мэдээлэл, Шуудан, Харилцаа Холбоо, Технологийн Газар, Азийн орнуудын мэдээллийн технологийн мэргэжилтнүүдийн шалгалтын зөвлөл /ITPEC/-тэй хамтран “Мэдээллийн технологийн инженерийн шалгалт”-ыг 11 дэх удаагаа амжилттай зохион байгууллаа.
Тус шалгалтын систем нь 4 түвшинтэй ба Монгол улсад мэдээллийн технологийн инженерийн стандартад үндэслэн эхний 3 түвшнийг нэвтрүүлээд байна. Энэ удаагийн шалгалтын 1-р түвшин буюу мэдээллийн технологийн паспорт шалгалтанд 23 хүн, 2-р түвшин буюу мэдээллийн технологийн инженерийн суурь шалгалтанд 136 хүн, 3-р түвшин буюу ахисан төвшний мэдээллийн технологийн шалгалтанд 13 хүн тус тус хамрагдаж нийт 5 хүн шалгалтанд тэнцлээ.
Мэдээллийн технологийн инженерийн суурь шалгалтанд Нийслэлийн ХУД-ийн 52-р сургуулийн багш Г.Ялалт амжилттай оролцож тэнцсэн ба Азийн 12 оронд хүлээн зөвшөөрөгдөх олон улсын сертификат гардан авах болсныг баяртайгаар мэдэгдэж байна. Түүнчлэн ерөнхий боловсролын сургуулийн багш нар дундаас анх удаа энэхүү шалгалтанд тэнцсэн Г.Ялалт багшийг идэвхтэйгээр дэмжин шалгалтанд оруулж, мэдээллийн технологийн инженерийн шалгалтын системийг хэрэгжүүлэх, мэдээллийн технологийн хүний нөөцийг хөгжүүлэхэд үнэтэй хувь нэмэр оруулсан тус сургуулийн удирдлагад чин сэтгэлийн талархал илэрхийлж байгааг хүлээн авна уу.